Latest Post

@ nas marxes. El asalto a la cultura

Logo dunha ampla paréntese de dous anos, retomamos o noso club de lectura @Nas Marxes cunha obra ambiciosa e coidamos que potente. Trátase de El asalto a la cultura de Stewart Home. E falaremos dela o vindeiro venres 25 de marzo reuníndonos na Biblioteca Concepción Arenal ás 19.00h.

Home é un autor irreverente que, sen concesións, nos presenta a súa obra dende o compromiso e o activismo, e así llo fai saber ao lector, a quen aconsella facer a lectura da mesma dende a mesma perspectiva.

El asalto a la cultura ten dentro dos seus múltiples obxectivos, o de trazar unha narrativa alternativa á cultura dominante e ir presentando os distintos movementos da contracultura ao longo do século XX, principalmente, sen desbotar ou esquecer as súas raíces mais ancestrais (goliardos, levellers, socialismo utópico, anarquismo… ).

Manifesto do Movemento Letrista

A contracultura e as vangardas son, como nos di sen dubidalo o poeta e ensaísta Lluís Calvo i Guardiola, un xeito de enfrontarse á tradición. Tradición entendida como construción social, discurso en contradición a través do tempo e o espazo e que, en ningún momento, deberá ser entendida como un canon sagrado, máis ben todo o contrario, un campo de batalla que ao longo do tempo vai creando liñas de lexitimación ou ruptura á mesma.

Deste xeito as vangardas que nos presenta Home veñen a supoñer unha verdadeira bomba de reloxería ou dinamita para os polos e para o bloque totalizador da tradición e a cultura do poder no século XX.

As propostas contraculturais que nos presenta Home: Letrismo, a Bauhaus, Internacional situacionista, Arte Nuclear, Fluxus, White panters, Punks, mail art, neoísmo, class war, entre outros moitos, centraron as súas forzas en facer saltar os cimentos da sociedade que habitaban -aínda que moitas veces os que saltaron foron os deles- e, sen dúbida, as súas propostas, manifestos, accións, debates e enfrontamentos quedaron coma unha preciosa nube de po de talco que segundo vire o vento vai asentándose nas marxes.

Teatro na rúa, Fluxus

Home vai tratar sempre de mostrar a súa irrupción como unha pata de cabra que fragmenta o monólito do poder sen agochar a reacción do mesmo, é dicir, como poder vai reconstruíndo esa desfeita, ese desgaste a través da apropiación e a asimilación, aínda que moitas veces non vai ser quen de dar resposta aos mesmos por parte da súa ignorancia e desafección ante o código.

Así, fronte a unha arqueoloxía da orde, do canon da eufonía propoñerán o caos, a imaxinación e a cacofonía como ferramentas que diseccionan a ortodoxia, negando todo o asentado.

A maioría das veces as vangardas, todas elas moi complexas, foron unha tempestade para a alta cultura vista como os restos dun naufraxio que lles costa afundir. É por isto que neste sentido debemos interpretar a loita atroz que se desencadeou.

Non debemos obviar que en todos eles non só está o pasado e o presente que lles tocou vivir, senón o futuro. A verdadeira besta a construír.

El asalto a la cultura é, sen dúbida, unha obra intelixente que deberemos levar nos nosos petos.

Amizade

Outros recursos :

. Calvo Guardiola, Lluís (2021). Els Llegats : una lectura contemporània de la tradició. Arcàdia

. Fisher, Mark (2021). K-Punk. Caja Negra

. Hausmann, Raoul (2011). Correo Dadá : (una historia del movimiento dadaísta contada desde dentro) Nueva edición ampliada, establecida y anotada por Marc Dachy. Acuarela Libros : A. Machado Libros

. McDonough, Tom (ed.) (2017) Boredom. Whitechapel Gallery : The MIT Press

. Pioneras del cine: al margen de la industria (2016). Soy Cámara do CCCB.

. Vadillo, Marisa (2010). Otra mirada: las fotógrafas de la Bauhaus. Universidad de Sevilla : Universidad de Córdoba.

Arquivo

RSS Feed descoñecido

  • An error has occurred; the feed is probably down. Try again later.

Categorías

10º Aniversario da Biblioteca Concepción Arenal
Código QR

Estatísticas do blog

  • 16.787 visitas
A %d blogueros les gusta esto: